Langile bat hil da asteon Gasteizen, eraikin baten estalkia konpontzen ari zela. Istripua joan den asteartean izan zen, baina gaur eman du horren berri ELA eta LAB sindikatuek. Behargina sei metroko altueratik erori zen. ELAren arabera, aurten jada 31 langile hil dira lan istripuetan. LABen zenbaketan, berriz, 40 hil azaltzen dira,.
Sindikatuak jakinarazi duenez, istripua 17:30 inguruan gertatu zen. Langilea eraikin baten teilatua konpontzen ari zen istripua gertatu zenean. Estalkia hautsi egin zen, eta behargina sei metroko garaieratik erori zen. Larrialdi zerbitzuak bertaratu ziren, baina ezin izan zuten ezer egin; langilea bertan hil zen.
ELAk elkartasuna eta babesa adierazi die beharginaren senideei eta lagunei. Salatu du prekaritatea izan dela istripuaren eragilea, eta gogora ekarri du horren ondorioak autonomoek pairatzen dituztela bereziki: «Prekaritate horren adibide dira, besteak beste, langile autonomoek egin behar dituzten lanaldi amaigabeak, bakarkako lan arriskutsuak eta babes neurri falta».
Egeora «larria» dela eta, sindikatuak Eusko Jaurlaritzari eta Confebaski exijitu die lan ikuskaritzak areagotzeko, enpresek lan prebentziorako neurriak betetzen dituztela berma dezaten.
Bi zauritu
Horrez gain, bi langile zauritu dira bi lan istriputan, bata Lesakan eta bestea Iruñean, Nafarroako larrialdi zerbitzuek jakinarazi dutenez. Lesakako istripua goizeko zazpiak inguruan gertatu da, Alkaiaga industrialdeko enpresa batean. Makina batek besoa harrapatu dio 23 urteko langile bati. Behargina Irungo Bidasoa ospitalera eraman dute.
Iruñeko istripua, berriz, 08:30ean gertatu da, Landabengo industrialdean. Langile bati pieza bat erori zaio gainera, eta orkatila hautsi du; 50 urteko behargina Nafarroako Unibertsitate Ospitalera eraman dute.
