Eusko Jaurlaritzaren Segurtasun Sailak jakinarazi duenez, leherketa bat izan da Laudioko (Araba) Vibrantz enpresako labeetako batean, 00:30ean; eta, horren ondorioz, langile bat hil da. Besteak beste, suhiltzaileak eta Osalaneko teknikariak bertaratu dira, istripua zergatik gertatu den ikertzeko.
Laudioko Vibrantz lantegian pinturak egiteko pigmentu ez-organikoak fabrikatzen eta merkaturatzen dituzte.
LAB sindikatuak egindako zenbaketaren arabera, aurten 32 langile hil dira lan istripuz; zendutako 33. langilea litzateke Laudiokoa. ELAk, berriz, lan istripuen ondoriozko 20 heriotza zenbatu ditu orain arte; 21 lirateke gaurkoa kontuan hartuz gero.
