Banaketa lanetan jarduten zuen langile bat hil da gaur goizean Laudion (Araba), istripu ez-traumatiko batean. Bebidas Serrano enpresan gertatu da ezbeharra, Ertzaintzak jakinarazi duenez.
Larrialdi zerbitzuek goizean goiz jaso dute abisua, 08:30 aldera. Langilea lurrean etzanda topatu dute lankideek, konorterik gabe. Osasun langileak eta Osakidetzaren helikopteroa bertaratu dira hura artatzera. Langilea suspertzen saiatu dira, baina ez dute lortu, eta bertan zendu da. Osalanek ikertzeari ekin dio, ezbeharraren nondik norakoak argitzeko. Lehen zantzuen arabera, lan istripu ez-traumatiko baten ondorioz hil da behargina.
