Lehen hiruhilekoan %10 jaitsi da auto berrien salmenta Hegoaldean

Pandemiak kontzesionarioetatik urrundu ditu erosleak, eta burua altxatu ezinda dabiltza sektore horretan. Ibilgailu berriak erosteko gobernuek iaz eman zituzten laguntzak ez ziren aski izan egoerari buelta emateko, baina saltzaileek lortu zuten, neurri batean behintzat, mantentzea, bereziki bigarren lauhilekoan. Dena den, laguntza horiek gabe eta urte hasieran gasolina autoei ezarritako zerga berriak direla eta, are gehiago aldendu dira bezero posibleak, eta urduritasuna nagusitzen ari da autoen sektorean.

Urte hasierako datuak «oso ezkorrak» direla azaldu dute Faconauto kontzesionarioen elkarteko kideek: %10,1 jaitsi da auto berrien salmenta Hego Euskal Herrian lehenengo hiruhilekoan: iaz epe berean baino 831 auto gutxiago saldu dituzte. Datu hori bere hartan ez da ikaragarria, baina kontuan hartu behar da iazko salmenta gehienak lehenengo bi hilabeteetan egin zirela, martxoaren 16tik aurrera kontzesionarioek beste sektore batzuek bezala itxi egin behar izan baitzuten pandemiarengatik. Hori dela eta,iazko martxoan baino %135 gehiago saldu dute aurten: 1.712 auto gehiago.

Saltzaileek, haatik, azpimarratu dute «zuzenagoa» litzatekeela 2019ko datuak konparatzea, eta,kasu horretan, %43,8 jaitsi da, bai martxoan eta bai lehen hiruhilekoan: duela bi urteko hil berean baino 2.327 auto gutxiago saldu dituzte aurtengoan, eta 5.787 gutxiago lehen hiru hilabeteetan.

Gainera, saltzaileek gogoratu dute 2019. urtea ere ez zela haiek espero zuten modukoa izan, auto berrien matrikulazioek behera egin baitzuten, lehen aldiz 2012az geroztik (-%6,8). Iazkoa, are okerragoa izan zen: laurden bat jaitsi ziren salmentak. Aurtengoa nola hasi den ikusita, alarmak piztu dituzte. Martxoko bilakaerak datozen hilabeteetarako joera ezarriko ote duen beldur dira. Azpimarratu dute herritarren txertaketa uste baino motelago doala, eta oraindik joan-etorrirako murrizketak daudela; hortaz, bigarren seihilekorako aurreikusten zuten gorakada «zalantzan» jarri dute.

Joerak sendotzen

Martxoko datuek beste joera bat erakusten dute: gero eta gehiago dira motor alternatiboen alde egiten duten erosleak: hirutik bat ia (%31,8). Kopuru horrek 20 puntu egin du gora 2019ko martxotik hona. Gasolinari jan dio zatirik handiena. Azken urteetan ohi den moduan, horiek saldu dira gehien (%50,8), baina hamahiru puntu jaitsi da duela bi urteko datuekin alderatuta. Dieselaren kasuan, berriz, hiru puntu baino ez. Dieselak badirudi behea jo duela edo jotzen ari dela. Joan den hamarkadaren erdialdetik kuota galdu eta galdu aritu da diesela, baina jaitsiera hori mantsoagoa izan da azken urteetan.