Salda bero dago Lezoko (Gipuzkoa) Interal elikagai prestatuen enpresan. Zuzendaritzak enplegua erregulatzeko espediente bat aurkeztu du, eta langileen herenei eragingo die; haren bidez, lantaldea osatzen duten 226 lagunetatik 85 kaleratu nahi ditu. Langile batzordeak gaitzetsi egin ditu asmo horiek, bi greba egun antolatu ditu, eta ez du baztertu greba mugagabera jotzeko aukera.
ELA sindikatuak jakinarazi duenez, lanuzteak ekainaren 26an eta uztailaren 2an egingo dituzte, eta, egoerak hobera egiten ez badu, uztailaren 8an ekingo diote greba mugagabeari. Batzordean bost ordezkari ditu ELAk, beste bost UGTk, eta hiru CCOOk.
Salatu dutenez, enpresaren erabakiak ezinegona sortu du langileen artean, haien herenak kaleratzea «oso erabaki traumatikoa» izango bailitzateke. Sindikatuen iritziz, espedientea ez dago justifikatuta, «azken urteetan enpresak etekin historikoak lortu baititu, baita dibidenduak banatu ere».
Supermerkatuen hornitzailea
Datozen egunetakoa ez da izango langileek azken hilabeteetan egin duten lehen protesta. Iaz, salatu zuten enpresak 28 langile kaleratu zituela batzordearekin negoziatu gabe, eta lan hitzarmena berritzeko negoziazioen harira ere mobilizatu dira.
Interalek saldak, zopak, saltsak eta prestatutako beste elikagai batzuk ekoizten ditu, besteak beste Mercadona, Aldi eta Lidl supermerkatu kateentzat. Marka zurien hornitzailea da.
