Merkatuek jaitsiera izan dute Bayrouren konfiantza mozioa dela eta

Frantziako blokeo egoeraren ispilua izaten ari dira gaur finantza merkatuak. Burtsak %2 inguruko galerekin hasi du eguna, bezperan %1,5 erori ostean, eta herrialdearen arrisku sariak gorakada izan du: 76 oinarrizko puntura iritsi da, apiriletik ikusi gabeko mailara.

Axa, Societe General eta BNP Paribas entitateen akzioek %6ren inguruko beherakadak izan dituzte, eta Barclaysen akzio saski bat %4 inguru erori da, Frantziako barne arriskuak eragin handia izaten baitu akzio horietan. 

Bayrou lehen ministroak deitutako konfiantza mozioak, hark aurrera ateratzeko dituen aukera eskasek eta, batez ere, Frantziak bere zor handia murrizteko ezintasunak kezka sortu diete inbertsiogileei eta merkatuei. 

Aurreko lehen ministroak, Michel Barnierrek, 90 egun baino ez zituen egin bere karguan, eta badirudi Bayrouren agintaldia zortzi hilabetera mugatuko dela. Aurrekontua aurrera ateratzeko jokaldia egin zuen atzo lehen ministroak, eta konfiantza mozio bat aurkeztu zuen oposizioak zentsura mozioak aurkeztu aurretik.

Konfiantza mozio horretan gehiengorik lortzen ez badu, erori egingo da Bayrouren gobernua. Eta oposizioko alderdi nagusien erantzuna ikusita, gobernuak oso zail izango du irautea.

Gobernuak ez du, dena den, etsipenik agertu nahi, eta Eric Lombardek karta indartsu bat erakutsi du: beldurrarena. Izan ere, gaur esan duenez, irailean gobernua erortzen bada, bada arriskurik Nazioarteko Diru Funtsak esku hartu behar izateko. «Arrisku hori dugu finantza egoera okertuz gero. Guk arrisku hori saihestu nahi genuke, baina ezin dizut esan ez dagoenik», esan du France Inter irratian.

Zorpetzea garestiago

Kontua da atzoko iragarpenarekin zorpetze kostuek beste koska bat egin dutela gora Frantziarentzat.

Herrialdearen arrisku saria —10 urterako Frantziaren zorrari merkatuak eskatzen dion interesa Alemaniakoarekin alderatuta— handiagoa da gaur egun Espainiako, Portugalgo eta Greziako arrisku sariak baino, eta gero eta hurbilago dauka Italiakoaren maila, soilik 8 puntura.

Italiako zorraren gaineko arrisku saria da gaur egun handiena Europan, 80 puntu ingurukoa. Eta orain Frantziakoa gerturatzen ari zaio. Askok espero dute bi asteren buruan Frantziaren arriskua gorago kokatuko dela.

Aldiz, dezente apalago daude Espainiaren, Portugalen eta Greziaren arrisku sariak. Izan ere, 2010-2012 urteetan herrialde haiek pairatutako zor krisi handiek eta haiei erantzuteko austeritate neurriek sekulako gorakadak eragin zituzten hiru herrialdeen arrisku sarietan, bere burua finantzatzea izugarri zailduz.

Baina denborarekin apalduz joan dira, Italiaren eta Frantziaren sarien azpitik jartzeraino. Horren adibide da Espainiako arrisku saria: 2012ko udan, 640 puntukoa zen, eta gaur egun, berriz, 56 puntukoa.

Merkatuko analisten ustez, irailean Bayrouren gobernua erortzen bada, gutxitu egingo dira herrialdeak defizita kontrolatzeko eta zorra murrizteko aukerak. Atzoko Bayrouren agerraldiarekin eta oposizioko alderdien erantzunarekin, hori gertatzeko probabilitatea handitu egin da.

Irailaren 8ko konfiantza mozioaren ostean etorriko da irailaren 10eko geldialdia. Hainbat sindikatuk eta alderdik deitu dute protestara Bayrouk iragarritako murrizketen kontra egiteko. Irailaren 8an gertatzen dena gertatzen dela, mobilizazioak eta udazken politikoki beroa espero dute Frantzian.

Krisi politikoari, gainera, testuinguru ekonomiko zaila ere gehitu behar zaio: arrisku geopolitikoa, merkataritza gerra...

Horrez gain, kontuan hartu beharrekoa da Europak inbertsio handiak egin behar dituela hazkundea bultzatu eta barne merkatua indartzeko. Analistek bi abiadurako Europa bat ikusten dute, eta Frantziak, ez baditu bere finantzak txukuntzen, ezingo dio Alemaniaren abiadurari eutsi.