Bost hiruhileko jarraian daramatza gora egiten Nafarroako barne produktu gordinak. Nahiko erritmo egonkorrean, gainera: %0,5 hazi zen iazko azken hiruhilekoan eta aurtengo azken bietan, eta %0,4, berriz, aurtengo lehenengoan. Ondorioz, BPGa duela urtebete baino %1,8 handiagoa da.
Goikoetxeak nabarmendu duenez, krisiaren aurreko mailara itzuli da Nafarroaren BPGa, 2007ko azken hiruhileko mailan baitago. Ez du esan, ordea, orduko halako bi dela langabezia eta gizartearen ongizatea neurtzen duten beste aldagai guztiek okerrera egin dutela.
Goikoetxeak onartu du azken hilabeteotan euroguneko ekonomiak izan duen motelaldiak eragin diezaiokeela Nafarroari ere, neurri batean hazkundea esportazioen bilakaera onari zor zaiolako. Edonola ere, Iruñeko gobernuak ez du aldatu urte amaierarako hazkunde aurreikuspena, %1,5ekoa.
Nafarroan baino pixka bat motelago doa ekonomia Hegoaldeko beste hiru lurraldeetan. Eustatek atzo kaleratu zuenez, uztailetik irailera %0,4 hazi da, eta %1,3 urte arteko tasan.
