OCDEk uste du ekonomiak motelaldi handia izango duela eurogunean

Euroguneko ekonomia geratu egingo da, eta atzeraldi arriskua handia da. Aurten BPG barne produktu gordinaren %1,6 haziko da, baina datorren urtean %0,3 eta 2013an %1,5. Ekonomia Lankidetza eta Garapenerako Erakundeak (OCDE) goitik behera aldatu ditu euroguneari buruzko ekaineko aurreikuspenak.

OCDEk ez du hitz egin langabeziari buruz. OIT Lanaren Nazioarteko Erakundeak, bai. Atzeraldia gertatzen bada, langabezia handituko da, «azkar eta nabarmen», seihilabeteko epean. OITk uste du, gainera, egungo joerei eutsiz gero langabezia tasa 2016 baino lehen ez dela apalduko krisiaren aurreko urteetako kopuruetara. Ekonomia suspertzeko enplegua sustatzeko eskatu du.