Radio Euskadin elkarrizketatu dute Iñigo Urkullu Eusko Jaurlaritzako lehendakaria. Espainiako Gobernuarekiko harremanetan, galdutzat jo du legealdia, eta Madrili egotzi dio horren ardura: "Bost bilera egin ondoren, proposamen zehatzak egin genituen, eta erantzunaren zain jarraitzen dugu". Aitortu du irailetik ez duela harremanik Mariano Rajoy Espainiako Gobernuko presidentearekin.
Bakegintzaz, legearen esparruan jokatzeko eskatu die Euskal Preso Politikoen Kolektiboko presoei eta Espainiako Gobernuari. Lehenei eskatu die espetxe onurak banaka galdegin ditzatela kolektiboki egin beharrean, eta Madrili, berriz, elkarrizketarako prest egon dadila: "Espainiako Gobernuko ordezkariek ETArekin negoziatu dute jardunean zegoenean. Gobernu honek ezin du presoekin hitz egin?". Halaber, eragindako oinazea aitortzeko eskatu dio ezker abertzaleari, eta armagabetzea ETAri.
Estatus politikoaz eta Espainiako lurralde antolaketaz, berriz, adierazi du ez duela PSOEren asmoen berri.
Ekonomia arloan, azaldu du krisialdi aurreko egoerara ez dela 2020 baino lehen itzuliko. Araban, Bizkaian eta Gipuzkoan langabe kopurua hazi izanaz, berriz, esan du datuak ezin direla "hilero" onak izan, baina "dinamika positiboa" dela. Ildo horretan, gogorarazi du hiru herrialde horietan iazko martxoan baino 6.000 langabe gutxiago daudela.
