Mutrikuko (Gipuzkoa) Yurrita e Hijos kontserba fabrikako langileak lantegiaren aurrean bildu dira gaur, hamabi lankideren kaleratzea eta oro har zuzendaritzak hartutako jarrera salatzeko. ELA sindikatuak gardentasun falta leporatu dio zuzendaritzari, eta jarrera autoritarioa izatea egotzi dio, argudiatuta enpresak uko egin diola kaleratze horiek negoziatzeari.
Enpresak 120 behargin ditu, eta horien eskakizunak dira kaleratzeak gelditzea, kaleratutakoak berriro hartzea, eta «benetako» negoziazioak abiatzea, besteak beste. ELAk salatu du zuzendaritza aldebakarreko erabakiak hartzen ari dela, alternatibarik eskaini gabe, eta ohartarazi du berregituraketa gehiago izateko ere arriskua badagoela.
