Urrizak ezin hobeto hasi du Buruz Buruko Kutxabank Torneoaren txapelaren defentsa, Ansa II.a 30-18 garaitu baitu. Jaun eta jabe izan zen aurrelari nafarra, eta eroso aritu zen estreinakoan. Defentsan maisua dela erakutsi zuen berriz ere, eta, erasoan aukera duenean, tantoak amaitzeko erraztasun handia du buruz buru.
Ansa saiatu zen, baina atzean geratu zen hasieratik. 11-2 aurreratu zen Urriza, eta urnietarrak arazoak izan zituen aurkariaren sakearekin. Bost tanto egin zituen txapeldunak lehenengoetan, eta ongi hastea garrantzitsua izan zen aurreneko partidako urduritasuna alboratzeko.
Hala ere, Ansa sakea hartuta lau tantora hurbildu zen, 19-15, baina ez zituen askoz ere tanto gehiago egin. Defentsan oraindik ere hobetu behar duela ikusi zen, baina bere dohainak erakutsi zituen piloteoan. 18 tantorekin, puntu negatiboa saihestu zuen zerorekin geratuz.
Urriza sendo eta eroso aritu zen, partidu guztian akats bakarra egin baitzuen: sakearekin falta bat. Lau puntu batu ditu garaipenarekin, eta finalerdia ia ziurtatu du.
