Konpondu dituzte 112 linean sortutako arazoak, eta normal dabil orain. Goizaldean hasi dira etenaldiak Larrialdiak Kudeatzeko Zentroan. Dei zentroko langileak ohartu dira jendeak zailtasunak zituela deiak egiteko eta, kasu batzuetan, deia moztu egiten zela hitz egiten ari ziren bitartean. Kasu horietan zentroko operadoreek itzuli diete deia laguntza eske deitu dutenei.
Jaurlaritzak ohar batean argitu duenez, arazoak ez die dei guztiei eragin, soilik batzuei. Dena den, eskatu dute arazoak konpondu bitartean 900-11 20 88 telefonora deitzeko edozein larrialdiren berri emateko.
Arazoa zerbitzua ematen duen telefono konpainiarena izan dela azaldu dute arduradunek, eta larrialdiak kudeatzeko beste zentro batzuei ere eragin diela. Telefono konpainiarekin harremanetan aritu da Jaurlaritza, zerbitzua bere onera itzuli ahal izateko.
Nafarroan ere arazoak eragin ditu zerbitzuak goizean goiz, baina, Nafarroako Gobernuak jakinarazi duenez, 09:00ak alderako deiak normal sartzen hasi dira berriz ere.
