Zaragozako Casetas auzoko tren geltokian (Espainia) istripu lazgarria gertatu zen atzo iluntzean. 20:20ak zirela, tren batetik jaitsi berria zen 22 urteko mutil bat harrapatu zuen beste tren batek. Larrialdi zerbitzuek artatu eta Zaragozako Miguel Servet ospitalera eraman zuten, baina han hil da azkenean. Gaztea Etxaurikoa zen (Nafarroa), eta saskibaloian jokatzen zuen Utebo herriko CB Octavus taldean.
Lekukoen arabera, errailetatik pasatzen ari zela, mutila ez zen jabetu alboko trenbidetik beste tren bat zetorrela. Bilbo-Bartzelona ibilbidea egiten ari zen gaztea harrapatu zuen trena, eta bertatik atera zituzten 101 bidaiariak, bidaia beste tren batean jarrai zezaten.
Guardia Zibila gertatutakoa ikertzen ari da, eta tokiko auzo elkarteek salatu dute oso arriskutsua dela geralekuaren egoera, erabiltzaileek errailen gainetik pasatu behar baitute alde batetik bestera igarotzeko.
