Atharratzetik (Zuberoa) Bilbora, 24. Korrikak bidea egingo du Euskal Herriko errepideen barrena. Baina ez da ibilbide ofiziala bakarrik izango, ikastetxeetan barrena ere egingo baitu bere ibilbidea. Izan ere, AEK-k gaur goizean aurkeztu ditu 24. Korrikaren inguruan sortu dituen unitate didaktikoak, bat ikastetxeetan erabiltzeko eta bestea euskaltegietan.
Eskolako materiala Euskal Herriko ikastolekin batera ondu dute, eta adinaren arabera sailkatu: Haur Hezkuntzatik (Xingi-Xango atala) Bigarren Hezkuntzara eta Batxilergora (Tarrapataka atala). Maila bakoitzerako hamabi jarduera prestatu dituzte, eta azkenengo mailarako —Tarrapataka—, hamalau.
Euskaltegietarako materiala, berriz, hizkuntza mailen arabera sailkatu dute: A1 mailatik C1era. Material hori AEKren Didaktika Sailak sortu du, eta nabarmendu dute material bat prestatu dutela bereziki entzumen arazoak dituztenentzat.
Euskaltegietarako berariaz sortu dituzten jarduerak hauek dira: Badator 24. Korrika!, 24. Korrikaren ibilbidearen jolasa eta Korrika historian. Adierazi dutenez, azken hori bereziki egokitu dute hezkuntza arruntean zailtasunak izan ditzaketenentzat.
Informazio guztia Korrikaren webgunean dago eskuragai.
