Paco Etxeberria auzi medikua eta antropologoa gidari zuen talde bat Zeanuriko (Bizkaia) Altun mendira joan dira, eta 1936ko gerrako gudari baten gorpua atera dute lurpetik. Pedro San Milllan Beitiarenak dira gorpuzkiak. Behintzat, harena da gorpuzkien ondoan topatu duten 21967 zenbakidun plaka. Perezagua batailoiko kidea zen, alderdi komunistari lotua. Horretaz gain, burdinazko kasko bat, aluminiozko katilu bat, kantinplora baten pusketak, hainbat kargadore eta kartutxoak ere aurkitu dituzte.
Euskal Prospekzio Taldeak egin ohi dituen bilaketetako batean topatu zuten gorpuaren arrastoa, irailaren 15ean.
Lurpetik ateratzean izan dira Aintzane Ezenarro Gogora institutuko lehendakaria, Eusebio Larrazabal Zeanuriko alkatea eta Jon Hernandez, Elkarrekin Podemoseko legebiltzarkidea, eta Euskadiko Alderdi Komunistako idazkari nagusia.
