Gaurkoaren moduko egun batez, 1977ko abuztuaren 28an, helmugara iritsi zen Askatasunaren Ibilaldia, hilabete eta erdiz Euskal Herri osoa lau zutabetan zeharkatu zuen mobilizazio politikoa. Franco diktadorea hil osteko garai gatazkatsu haietan mugarri izan zen Ibilaldia, eta, zenbait historialariren arabera, Euskal Herrian inoiz egindako agerraldi politikorik jendetsuena izan zen hura.
1977ko uztailaren 10ean abiatu zen Zarauztik (Gipuzkoa), Gernikatik (Bizkaia), Aguraindik (Araba) eta Lodosatik (Nafarroa), eta abuztuaren 28an Aratzurin (Oltza, Nafarroa) bukatu, lau zutabeek bat eginda. Amnistia, Euskal Herriaren nazio aitortza, nazio izaera aintzat hartuko zuen autonomia estatutua eta Espainiako polizia indarrek Euskal Herritik alde egitea izan ziren ibilaldiaren aldarrikapen nagusiak.
Sareetan bideo bat hedatu dute, urteurrena oroitu eta 2027an mobilizazio historiko horren 50. urteurrena izango dela gogorarazteko.
