Ttattola Hazparneko (Lapurdi) gaztetxe ohiko kide bat epaitu dute Baionako auzitegian, 2021eko agorrilean etxe huts bat legez kanpo okupatzea leporatuta. Prokuradoreak 600 euroko isuna eskatu du gibelapenarekin, eta etxeko jabearen abokatuak 8.000 euro ingururen kalte ordainak. Defentsako abokatuak errugabetzat jotzeko eskatu du. Ekainaren 22an emanen dute erabakia.
Hazparneko Davidenia etxea okupatu zuten gaztetxekoek, Ttattola zenaren falta adierazteko —urte bereko urtarrilean berreskuratu zuen jabeak aurreko egoitza— eta Hazparneko etxe hutsen kopurua salatzeko. Egoitza berriko jabeak hala galdeturik, astebetera jaso zuten kanporatze agindua. Hilabete inguru iraun zuten bertan, jendarmeek kanporatu arte.
Etxebizitza okupatuan «indarrez eta mehatxuz» sartu izana leporatu diote auzipetuari, baina epailearen galderei erantzunez akusatuak erran du ez dakiela gazteak nola sartu ziren eraikinera. «Ni iritsi nintzenean atea irekia zen». Larunbatean sartu ziren gazteak, eta auzipetua denak erran du bera igandean iritsi zela. «Banekien etxe okupatua zela, eta gazteen helburua zela presio egitea herriko etxearengandik gaztetxe bat lortzea».
Gaztetxea kudeatzen duen elkartearen izenean elektrizitate eta ur kontratuak egin zituzten, «ez genuen jabea lapurtu nahi», eta baratzean oilo batzuk jarri zituzten arrautzak izateko. «Momentu bakar batean ere ez genuen eraikina andeatu; alderantziz, entretenitu genuen. Gure helburua zen herriko etxeari dei egitea. Jabearekin harremanetan ematen entseatu ginen, baina ez genuen lortu», adierazi du.
Christophe Deprez parte zibileko abokatuak erran du «harriduraz eta suminduraz» hartu zuela ekintza etxeko jabeak. Adineko emazte bat da, zaintza bereziak dituena. «Ez zen leku abandonatu bat, tarteka joaten zen. Bere etxean indarrez sartzen zirela sentitu zuen, lapurtua zela». Sarraila hautsia izan zela erran du. «Ezin dugu onartu, kausa edozein izanik ere beste baten jabetzan indarrez sartzea».
Yolanda Molina defentsako abokatuak auzitan eman du okupazioa pertsona bakarrari leporatu nahi izatea. «Ez da elkartearen ordezkari legala; ezin duzue beregain eman ekintzaren ardura». Etxea erabat hutsa zela azaldu du: «Argazkiek erakusten dute: erabat abandonatua zen». Okupazioa ekintza sinbolikotzat jo du, eraikina herriko etxe aitzinean baitago. Izan ere, azpimarratu du Hazparneko herriko bozetan hautagai batek baino gehiagok hitzeman zuela Ttattolari egoitza ematea. Gehiegizkotzat jo ditu eskatutako kalte ordainak.
8.000 eurotik gora eskatu dituzte Ttattola gaztetxe ohiko kidearen kontra
2021eko agorrilean Hazparneko etxe huts bat okupatu zuten herriko etxeari lokal bat eskatzeko. Defentsak alegatu du ezin zaiola kide bakarrari ekintza kolektiboa egotzi
![Jende andana bildu da Baionan, Ttattolako kideei sostengua adierazteko. GUILLAUME FAUVEAU. Jende andana bildu da Baionan, Ttattolako kideei sostengua adierazteko. GUILLAUME FAUVEAU.](https://www.berria.eus/uploads/s1/73/61/41/p010-f01.jpeg)
Iruzkinak
Ez dago iruzkinik
Ordenatu