Abian da bizikidetzari buruzko Baketik-en ikastaroa

Abian da Baketik-ek bizikidetzari buruz antolatu duen ikastaroa. Herenegun hasi, eta abenduaren 15era arte iraungo du, astero bilera bana eginda Gipuzkoako lau herritan —Eibarren eta Arrasaten astelehenetan, Donostian astearteetan eta Tolosan asteazkenetan—. Antolatzaileek azaldu dutenez, pertsona, gatazka eta adiskidetzea izango dira ikastaroaren ardatzak. Bizikidetza kontuetan interesa duten pertsonentzat da; bereziki, irakasle, aisialdirako begirale, elkarteetako arduradun, udal teknikari, gizarte hezitzaile, gizarte langile eta gaian erantzukizuna duten kargudun, politikari eta profesionalentzat. Lau ildo nagusi transmitituko dituzte ikastaroan parte hartuko duten adituek: batetik, bizikidetzarako ezinbestekoa dela pentsatzea norberaren perspektibak ez direla osoa; bigarrenik, zailtasunak asko izan arren, aukerei begiratu behar zaiela; hirugarrenik, norberaren ekintza etikoen ardura onartzea; eta, laugarrenik, bizikidetzaren ardatza gizakiaren duintasuna dela. Baketik zentroak antolatu du ikastaroa, Gipuzkoako Foru Aldundiaren laguntzarekin.