Getxoko Udaltzaingoak gizon bat atxilotu zuen larunbatean Algorta auzoan (Bizkaia), adingabe bati sexu erasoa egitea egotzita. Atzo eraman zuten guardiako epaitegira, eta bermerik gabe espetxeratzeko agindu zuen epaileak.
Getxoko Udalak ohar bidez jakinarazi du emakumeen kontrako indarkeriaren aurkako protokoloa abiatu duela. Halako erasoak «onartezinak» direla esan, erasoa salatu, eta andreen kontrako «indarkeria mota guztiak» gaitzetsi dituzte. Erasoa jasandakoari «elkartasuna eta babesa» adierazi dizkiote. Gaineratu dute kasu honek emakumeen aurkako indarkeriaren «parte bat baino» ez duela agerrarazten, eta emakumeen eta gizonen arteko desberdintasunean duela jatorria.