AHTren auzian ere herritarrei hitza emateko eskatu diote Ibarretxeri, honek parte-hartzeaz hitzaldia eman duenean

Parte-hartzeaz hitzaldia eman du gaur goizean Juan Jose Ibarretxe Eusko Jaurlaritzako lehendakariak Donostian, Miramar Jauregian, udako ikastaroen barnean, eta hainbat lagunek Abiadura Handiko Trenaren (AHT) auzian ere erabakitzeko eskubidea gauzatzeko eta herritarrei hitza emateko eskatu diote. Azkenerako bizkartzainek lau lagun aretotik bidali egin dituzte.



Erabakitzeko eskubidea eta galdeketa aldarrikatu ditu Jaurlaritzako lehendakariak, "parte-hartzea etorkizuna eta debekua iragana" dela esanez -Espainiako Auzitegi Konstituzionala, Eusko Legebiltzarrak ekainean onartutako Galdeketaren Legeari Espainiako Gobernuak sartutako helegitea aztertzen ari da-, eta entzuleen artean emakume batek galdetu dio nola egin daiteken bateragarri aldarri hori aldi berean AHTri buruz hainbat herritan egindako galdeketen emaitzei "kasurik ez" egitearekin. Ibarretxek erantzun dio auzi horretan "parte-hartzeko bideak" badaudela eta ekarpena posta elektronikoz igor dezala.

Trenaz galdeketa egin den herrien zerrenda erakutsi diote kartelen bidez (Urbina, Gasteizko 20 kontzeju, Itsasondo, Atxondo, Alegia, Aramaio, Angiozar, Elorrio, Anoeta, Uztaritze eta Mugerre). Ondoren, beste emakume bat eta bi gizonezko trenaren aurkako argudioak ematen saiatu dira, baina bizkartzainek haiek eta beste lagun bat aretotik atera egin ditu. Identifikatzeaz gain, desordenu publikoa egotzita salaketa sartuko dietela esan diete.

Bide batez, Miramar Jauregiaren kanpoan dozena bat lagunek AHTren aurkako eserialdia egin dute.

PPren ekimena

Antonio Basagoiti EAEko PPko presidentea Iñigo Urkullu EAJko lehendakariarekin eta Patxi Lopez PSE-EEko idazkari nagusiarekin bilduko da AHTz, eta trenaren aldeko manifestazioa antolatzeko proposatuko die. Basagoitik egitasmoa burutzeko diru gehiago jarri behar dela ere azpimarratu du.

Lopezek adierazi du ez dela beharrezkoa "kalera irtetea" AHT bultzatzeko.