Aita Mari ontziak 53 pertsona erreskatatu ditu gaur goizaldean, Mediterraneo itsaso erdialdean. 05:29an jaso du larrialdi abisua, eta, koordinazio zentroek erantzuten ez zutenez, erreskatea egitea erabaki dute. Erreskatatutako gehienak Eritreakoak, Etiopiakoak eta Hego Sudangoak dira.
Azaldu dute guztiak gazteak edo adingabeak direla, eta «egoera larrian» zeudela, itsasoan hiru egun egon eta gero. «Erreskatatutakoek deshidratazio, zorabio eta neke zantzu agerikoak zituzten, eta bronkitis kasu batzuk ere diagnostikatu ziren hotzean luze egotearen ondorioz», dio oharrak. Gehitu dute ontziko medikuak kasu larriak aztertzen jarraitzen duela.
Ontzia Sizilia ekialdeko Catania portura igorri dute (Italia), eta bertan lehorreratuko da bihar arratsaldean.
