Allik 2011ra arte ez dio utziko legebiltzarkide izateari

Juan Cruz Alli ez da CDNren presidente izateko hautagai aurkeztuko 2008an -lehengo astean iragarri zuen erabakia-, baina Nafarroako Parlamentuan legebiltzarkide izaten segituko du legealdia bukatu arte, 2011ra arte, gaur berak jakinarazi duenez. "Jainkoak uzten badit, osasuna badut, agintarien baimenarekin eta eguraldiak ez badu eragozten, legealdian ez dut jarduera politikotik erretiratzeko asmorik", esan du Allik, broma artean.

1995ean sortu zuten CDN alderdia, eta Allik datorren urtean "belaunaldi aldaketa" gauzatzeko utziko dio bertako buru izateari. "Ni dagoeneko 65 urteko aitona naiz, eta nik baino gogo handiagoa eta biharko eguneko begia duten gazteak badaude alderdian".

CDNk maiatzaren 27ko Nafarroako foru hauteskundeetan bi eserleku lortu zituen.