Sotana gorria jantzita

Gotzain izateko gehienezko adina gainditua du. 85 urte eginak, kargu berria iritsi zaio Vatikanotik: kardinal izendatu dute Fernando Sebastian, Iruñeko artzapezpiku ohia. Eliza katolikoaren sektore atzerakoienaren ikur da. Abortuaren legeaz aritu zen atzo bertan. «Andre batek ba al du eskubiderik bere umea hiltzeko?». Sotana gorriarekin —kardinalek erabiltzen dute—, Vatikanoan hedatu ahal izango du aldarria.

Ez du berria adierazpenetarako irrika. Politikaz aritu zen Iruñean: sozialista eta kristaua izatea «bateraezin» direla, independentismoa «baztergarria» dela... «Doktrina sozial katolikoa» duten alderdien alde egin zuen. Hark jarri zituen Elizaren izenean ehunka eliza, lursail eta bestelako.