Andrazkoak bortxatzea egotzita, bi gizon atxilo

Bizkaian bi gizon atxilotu dituzte azken orduetan; emakume bat bortxatzea egotzi diote bati, eta beste bat bortxatzen saiatzea besteari. Busturian eta Bilbon gertatu dira erasoak. Bilbon, igandean jazo zen erasoa. Ertzaintzaren arabera, bi mutilekin adiskidantza egin zuen andre batek, eta haietako baten etxera joan ziren hirurak. Mutiletako batek sexu harremanak izatera behartu nahi izan zuen. Emakumeak ihes egitea lortu zuen. Beste mutilak sakelako telefonoa, argazki kamera eta kate bat lapurtu nahi izan zizkiola ere salatu du emakumeak. Bi mutilak atxilotu ditu Ertzaintzak; lapurreta egotzi dio bati, eta sexu erasoa egitea besteari. 21 urte ditu azken horrek.

Beste erasoa Busturian gertatu zen, larunbat goizaldean, Altamira auzoko festetan. Gizon bati bere etxera lagundu zion emakume batek, eta, behin etxean, gizonak bortxatu egin zuen emakumea. Ertzaintzari salaketa aurkeztu zion, eta poliziek larunbat goizean bertan atxilotu zuten gizona. 35 urte ditu.

Beste hiru gizon ere atzeman dituzte poliziek asteburuan, genero indarkeria leporatuta, hirurak Bilbon. Igandean, 37 urteko gizon bat atxilotu zuten; bikotekide ohiari irain egin eta aurpegian jo ziola azaldu du Eusko Jaurlaritzako Herrizaingo Sailak. Igande gauean, beste gizon batek bikotekide ohiari kalean eraso egin ziola ere jakinarazi du Ertzaintzak. Taberna baten kanpoko aldean jazo zen. 46 urte ditu atxilotutako gizonezkoak. Atzo goizaldean, berriz, 19 urteko mutil bat atxilotu zuten, urruntze agindu bat urratu zuelakoan. Gainera, biak inputatu dituzte, gizona eta andrea, elkarri eraso egin diotelakoan.