Andre bati sexu erasoa egitea egotzita, gizon bat atxilotu dute Bilbon

Udaltzainek 28 urteko gizon bat atxilotu zuten larunbatean Bilbon, 19 urteko neska bati sexu erasoa egitea leporatuta. Iragan astelehenean izan zen erasoa, Askatasunaren Hiribidean. Ustez, atxilotuak sexu ukituak egin zizkion. Larunbatean, berriz, beste gizon bat atzeman zuten Bilbon bertan, bikotekidearekiko zuen urruntze agindua apurtu eta tratu txarrak ematea egotzita. Biktimaren lagun baten senarrari jotzea ere leporatzen diote. Bikotekide ohiari eraso egitea egotzita, berriz, beste gizon bat atxilotu zuten Ertzainek Durangon (Bizkaia). Emakumea erietxera eraman zuten. Espetxera bidali dute, berriz, larunbatean Beasainen (Gipuzkoa) ustez bikotekideari labana sartzen saiatu zen gizona.