Antton Kurutxarri izanen da Baigorriko (Nafarroa Beherea) auzapez berria. Larunbat honetan eginen duten herriko kontseiluan izendatuko dute. 2014tik, Jean Michel Koskarat izan da barnealdeko herriko txiki horretako auzapeza, baina kargua utzi du bigarren agintaldia bukatu aitzin, osasun arazoengatik.
Kurutxarri zinegotzi aritu da orain arte, baina EH Baiko kidea ezaguna da Ipar Euskal Herrian. Izan ere, Euskal Hirigune Elkargoko lehendakariordea da, euskararen eta okzitanieraren aldeko hizkuntza politiken eta kultura sailaren buru. Azken hiru urteetan EEP Euskararen Erakunde Publikoko lehendakaria ere izan da.
Ofizioz, Historia-Geografia irakaslea da Kurutxarri. Baionako Villa Pia lizeoan lan egiten du.
