Hainbat datu plazaratu ditu gaur Euskobarometroak maiatz amaierako txostenean; besteak beste, Euskal Autonomia Erkidegoaren estatus politikoaz. Horien arabera, Araba, Bizkaia eta Gipuzkoako herritarren %39k bozkatuko lukete independentziaren alde balizko erreferendum batean, eta %34k, aldiz, kontra. %13k abstentziora joko lukete.
Galderan, ez dute zehaztu Euskal Herriaren independentziaz edo autonomia erkidegoarenaz ari diren. Edonola ere, abertzaleen gehiengoak (%68k) aldeztuko luke independentzia, eta baita euren burua abertzaletzat ez dutenen %13k ere. Halaber, EH Bildu koalizioari botoa eman diotenen %90ek bozkatuko lukete estatu propioaren alde, eta beste hainbeste egingo lukete EAJko boto emaileen %44k ere.
Emaitzak ezberdinak dira, estatu berria Europako Batasunetik kanpo geratuko balitz. Kasu horretan, %31k bozkatuko lukete independentziaren alde —zortzi puntu gutxiago—.
Galdetzearen alde
Halaber, estatu propioa eratzearen inguruko erreferenduma egitearen alde daude Arabako, Bizkaiko eta Gipuzkoako herritarren %58. Joera hori zortzi puntu hazi da 2012ko azaroaz geroztik. Abertzaleen artean, gehiengo dira galdetzearen alde daudenak (%83), eta ez abertzaleen artean, berriz, %33 daude independentziari buruzko galdeketa bat egitearen alde.
%27 daude erreferendum bat egitearen kontra, eta %13, berriz, ez alde eta ez kontra. Esaterako, ez abertzaleen artean %48 dira galdeketaren aurka daudenak —erdia baino gutxiago, beraz—, eta datu hori 11 puntu jaitsi da sei hilabetean.
Independentzia nahiaz galdetuta, itaundutako %37k diote nahi "handia" dutela estatu independente bat izateko. Aukera babestuena da eta sei puntu egin du gora datuak urte erdian. Nahi "apala" dute %21ek, eta ez dute batere desirarik %30ek.
Gainera, %37k uste dute hobeto biziko liratekeela Espainiarengandik bananduta, eta sei hilean hamar puntu hazi da aukera hori. Okerrago biziko liratekeela uste dute %26k —iazko azaroan baino %8 gutxiago—, eta berdin biziko liratekeela iritzi diote %16k.
Bestalde, galdetutako herritarren artean %46k jotzen dute euren burua abertzaletzat, eta %48k, berriz, ez abertzaletzat. %34 dira euren burua soilik euskal herritartzat dutenak, eta beste hainbeste euren burua euskal nahiz espainiar herritartzat dutenak. %21 dira, ordea, espainiar baino gehiago euskal herritar sentitzen direnak.
