Arraia-Maeztuko (Araba) alkate Gemma Ramosek (EAJ) dimisioa aurkeztu du, eta lan horiek egiteari utziko dio datorren udal bilkuraren ostean. Alkatea bajan egon da, eta Bersaitz Alegre alkateordeak, hura ere EAJkoa, behin-behinean hartu du haren jarduna azken asteetan.
EH Bilduk eskatuta egindako ezohiko bilkuraren aurretik iritsi da alkatearen erabakia. Hain zuzen, gaur eguerdian egin dute hura, Alegreren gidaritzapean. Bilkurako gai nagusia izan da uztailaren 22ko astean Arraia-Maeztuko udaletxea itxita eduki izana. EH Bilduren esanetan, udal gobernuak «bizilagunei, teknikariei, administrazio batzarrei eta oposizioko taldeari» jakinarazi gabe hartutako erabakia izan zen hura. Orduan, EH Bilduk salatu zuen «desgobernua» zela nagusi udalean, eta «funtzioen utzikeria» kritikatu zuen. Izan ere, Alegrek uztailaren 30ean hartu zuen udalaren gidaritza behin-behinean; astebete geroago.
Iazko udal hauteskundeen ostean, Arraia-Maeztuko Udala EAJko lau zinegotzik eta EH Bilduko hiruk osatu zuten, eta Ramos jeltzalea izendatu zuten alkate. Orain, udalbatzak datorren osoko bilkuran jorratu beharko du alkatearen dimisioa, eta haren ordezkoa aukeratu. Bitartean, EH Bilduk EAJri eskatu dio haren «barne arazoek» ez dezatela herrian eraginik izan.
