Ekainaren 17an ezkontzeko eskatu zuen Arrangoitzeko (Lapurdi) gay bikotea ezkonduko du Herriko Etxeak azkenean. Jean Mixel Colo auzapezak uko egin dio, kontzientzia arrazoiak aipatuz, bi gizonak ezkontzeari. Alabaina gaur udaleko ordezkariekin egindako bilera batean hautetsietako bat —ez dute zehaztu nor— ezkontzeko prest agertu dela azaldu du alkateak, AFP berri agentziara igorritako ohar batean.
Colo maiatz amaieran agertu zen sexu berekoak ezkontzearen aurka, eta Ipar Euskal Herrian eta Frantzian indarrean sartu berri den lege berria ez zuela beteko agindu zuen. Bere jarrerak oihartzun handia izan du azken asteotan. Aste honetan bertan Baionako suprefetak deitu du deklaratzera auzapeza. Atzo, berriz, ezkontzeko eskatu zion bikoteak auzapezaren aurkako salaketa jarri zuen.
