Artzain Onean itxita dauden lagunek gutuna igorri diete Zapaterori eta Sarkozyri, "sakabanaketa kriminala" bukatzeko eskatuz

Donostian Artzain Onean presoen alde itxialdia egiten ari diren lagunek gutuna bidali diete Jose Luis Rodriguez Zapatero Espainiako Gobernuaren presidenteari eta Nicolas Sarkozy Frantziakoari, "sakabanaketa kriminala" bukatzeko eskatuz, "politika horrek oinazea besterik ez dakarrelako".

Gaixotasun larriak dituzten presoak oraindik kartzelan daudela gogoratu diete Zapaterori eta Sarkozyri, baita zigorraren hiru laurdenak beteta dituztenak ere, eta haiek denak libre uzteko eskatu dute. Presoak Euskal Herrira ekartzeko ere bai. "Horretaz gain, zuen gobernuak presoekiko tratu duinerako eskubidea urratzen du, osasunekoa, komunikaziokoa, hezkuntzakoa, hizkuntzakoa, askatasunekoa, amatasun eta aitatasunekoa, defentsa juridikokoa, eta presoen multzoari izaera politikoa ukatzen diozue. Sekula ez ditugu haiek bakarrik utziko".

"Politika eta bizi baldintza horiengatik" 22 preso hil direla diote eskutitzean, eta joan den abenduaren 25ean hamaseigarren senidea hil zela sakabanaketa dela-eta, aurreko egunean preso bat bisitatzera zihoala auto istripua izan ondotik Teruelen (Espainia).

Euskal Herriko gatazka politikoa gainditu egin behar dela uste dute Artzain Onean presoen alde itxialdia egiten ari direnek, eta horretarako euskal herritarrek erabaki behar dutela euren etorkizuna. Ildo horretan, amnistia eskatu dute.

Mercedes Gallizo Espainiako Espetxeetako zuzendariari eta Rachida Dati Frantziako Justizia ministroari ere igorri diete gutuna.