Sabin Mendizabal Soraluzeko (Gipuzkoa) herritarraren euroagindu eskaerak aztertu dituzte gaur Paueko Auzitegian (Okzitania), eta heldu den asteartean emanen dute horiei buruzko deliberoa. Bitartean, espetxean jarraitu beharko du.
2009tik ihesean zegoen Mendizabal, eta joan den martxoaren 24an atxilotu zuten, Donapaleun (Baxenabarre). 2005ean Gasteizen egindako “kale borrokako” ekintza batekin lotzen dute euroagindu eskaera bat. Bi galde ditu orotara. Abokatuaren arabera, “ongi” pasatu da epaiketa.
Joan den apirilaren 8an epaitu zuten lehen aldiz Mendizabal, baina epaileak auzia berriz egitea erabaki zuen. Gaur iragan da bigarren aldiz epaiketa. 25 lagun inguru joan dira Pauera hura sostengatzera.
