Oposizioko alderdiekin adostasunez lortu ez dutenez, 2019ko aurrekontu proiektua erretiratu eta 2017koak berriz luzatzea erabaki Gasteizko udal gobernuak —bigarren urtez jarraian luzatu dituzte aurrekontuak—. EAJ eta PSE-EE daude gobernuan Arabako hiriburuan, baina gutxiengoan ari dira gobernatzen, eta beraz, beste talde baten babesa behar zuten aurrekontuak aurrera ateratzeko. EH Bildurekin aritu dira negoziatzen azken egunetan, baina ez dute adostasunik lortu, Itziar Gonzalo Ogasun zinegotziak jakinarazi duenez. "Ez du zentzurik eztabaida antzu bat mantentzeak", argudiatu du Gonzalok, oposizioko alderdiek adostasunerako borondaterik ez dutela iradokiz. Dena den, unean uneko akordioak lortzeko eskaintza egin die, 2017ko aurrekontuei diru sailak eransteko aukera badagoela gogora ekarriz.
EH Bilduk nahiz PPk nabarmendu dute udal gobernuaren porrota dela erabaki hori, eta Urtaran alkatearen lidergo falta aipatu dute, besteak beste. EH Bilduren bozeramaile Miren Larrionek "hitza ez betetzea" leporatu dio udal gobernuari.
Hiriburuan bezala, Arabako Foru Aldundian ere luzatu egin behar izan ditu aurrekontuak Ramiro Gonzalezen gobernuak. Han ere ez dute gehiengorik EAJk eta PSE-EEk. EH Bilduren botoei esker onartu zituen aurrekontuak aurreneko bi urteetan, eta PP izan zuen bazkide gobernuak iaz. Aurten, ordea, ez dute talde horien babesik lortu.
