Ehiztariek Arabako Foru Aldundiaren hamalau eguneko baimena dute zain egoteko eta otsoa bertatik pasatzen bada hiltzeko. Equo Berdeak alderdiak «Arabako azken otsoa» ez hiltzeko eskatu du, «bioaniztasunaren kontrako atentatua» dela iritzita. Ramiro Gonzalez Arabako ahaldun nagusiak esan duenez, ez dakite zehazki azken otsoa den, baina gehienez ere bi daudela ziurtatu du. Azaldu du ehiztariek luza daitekeen hamalau eguneko baimen bat daukatela otsoa ager daitekeen lekuetan zain egon eta hura hiltzeko. Hori eragotzi nahian, Ingurumen Fiskaltzara joko du Euskadiko Otsotaldeak.
Gonzalez, berriz, otsoaren ehizaren alde agertu da, «nekazaritza estentsiboaren aldeko apustua» egiten duelako. «Egoerak okerrera egin du, eramanezina izateraino, eta nekazarien bizimodua baldintzatzen du», nabarmendu du. Ahaldun nagusiak eman dituen datuen arabera, otsoak 153 animalia hil, 78 zauritu eta 67 desagerrarazi ditu 2019an.
Equo Berdeak alderdiak behin eta berriz eskatu du otsoa babestu behar dela dioten eremu zientifikoko ahotsei entzuteko, espezie horrek laguntza ematen duelako «ekologiaren oreka, euskal ondare naturala eta kulturala eta bioaniztasuna» mantentzeko.
Arabako ahaldun nagusiak esan du Otsoaren Kudeaketa Planak ehiza baimentzen duela, aurretik hartutako neurriek ez dutelako eraginik izan. Euskadiko Otsotaldeaez dago ados horrekin. Esan dutenez, taldeak esku artean du «otsoa ezabatzea» justifikatzen duen txostena, eta, bertan, ageri da nekazariek neurriak hartu dituztela otsoarengandik babesteko, baina ez dira zehazten zein diren. Talde horrek dioenez, txostenak dio ustiapen batzuetan hamar eraso baino gehiago egin dituela otsoak, baina hori ez dela posible esan dute taldekideek: «Ezinezkoa da otso batek hainbeste kalte eragitea mastin txakurrak –aldundiaren arabera hori da metodo eraginkorrena– dituen ustiategi batean».
