Espainiako Kontuen Auzitegian deklaratu dute asteon Ainhoa Intxaurrandietak eta Iñaki Errazkinek; "botere desbideraketa" egotzita, 46 milioi euro arteko zigorra jaso dezakete, bizi guztiko kondena ekonomikoa. Horiek hala, bi auzipetuei elkartasuna helarazteko ekitaldia egin dute Azpeitian. Txaloka hartu dituzte biak herriko plazan.
Dozenaka lagun elkartu dira plazan. Auzipetuez gain, han ziren EH Bilduko Arnaldo Otegi, Maddalen Iriarte, Miren Larrion eta Marian Beitialarrangoitia. Azken horrek salatu du Intxaurrandieta eta Errazkin ez dituztela epaitu erabaki oker bat hartzeagatik: "Denborak erakutsi du zuzen jokatu zutela, zuzen jokatu genuela, errauste planta gaindimentsionatua zegoela. Horregatik ari dira gaur egun txikiago bat eraikitzen, ez beste ezergatik".
Iriartek nabarmendu du badela garaia "akordio zabalak" eraikitzeko: "Orain geratzea atzera egitea da. Dagoenari eustea ez da aukera bat. Herri honetan eta bere geroan sinesten duten guztiei bide hau elkarrekin egiteko deia egiten diegu".
