PSE-EEko bozeramaile Idoia Mendia Radio Euskadin elkarrizketatu dute, eta bertan eskatu du bakegintza "alderdien borrokatik kanpo" uzteko. Gaur aurkeztu du Iñigo Urkullu Eusko Jaurlaritzako lehendakariak Bake eta Bizikidetzarako Plana, eta horren harira jardun du Mendiak.
Azaldu du PSE-EEk "lankidetzan aritzeko eta akordioak egiteko borondatea" duela bakegintzaren alorrean. Eusko Legebiltzarreko Bake eta Elkarbizitzarako Batzordeaz, Mendiak aitortu du egoera batzuk ez direla "izan beharko luketenak", PPk parte hartzen ez duela eta. EH Bilduz, berriz, esan du koalizioa ez dela ari "aurreko legealdiko adostasunaren oinarriaren gainean" lanean.
Mendiak koalizioari ohartarazi dio "zoru etikoa beharrezkoa eta ukaezina" dela legebiltzarreko batzordean jarduteko.
"Asko hobetu" daiteke plana, PPren ustez
Plana "asko hobetu" daitekeela esan du PPko EAEko idazkari nagusi Iñaki Oiarzabalek, eta gaineratu du "zuzentzeko gauza asko" dituela. Haren esanetan, PP prest dago elkarbizitzaren alde "arriskatzeko", baina beharrezkotzat jo du Jaurlaritzak "ETAri legitimazioa kentzeko" lan egitea.
