Asteburuan Zizurkilen (Gipuzkoa) atxilotutako bi gizonak baldintzapean aske utzi ditu epaileak, Eusko Jaurlaritzako Segurtasun Sailak jakinarazi duenez. Ostiral gauean emakume bati sexu eraso bat egin eta lapurtu izana egozten diete. Ertzaintzak zabalik du ikerketa.
Zizurkilgo Udalak irmo salatu zituen gertakariak igandean zabaldutako ohar batean, eta «elkartasuna eta babesa» helarazi zizkion eraso egin zioten emakumeari, baita bere eskura dituen baliabideak eskaini ere. Udalaren iritziz, gertatutakoak erakusten du «gizarte parekide batetik urrun gaudela», eta «ezinbestekoa» dela feminismoaren bidean urratsak egiten jarraitzea.