Yolanda Barcinak ez zuen autokritikarik egin atzo, UPNren gazteriaren 11. kongresuko amaiera ekitaldian. Kontrakoa. UPNko gazteei eskatu zien defenda ditzatela "lurralde hau, gure printzipioak eta UPNren eta Nafarroaren zintzotasuna". Barcinak onartu zuen beharrezkoa dela politika aldatzea, "baina ez Nafarroa suntsituta, batzuek nahi duten moduan". Politika aldatu behar da, esan zuen Barcinak, "baina Nafarroan sinesten".
Nafarroako Gobernuko eta UPNko presidentearentzat egungoa da alderdiaren historiako une zailenetakoa, bai krisi ekonomikoarengatik —"inork uste baino gehiago irauten ari da"— eta baita krisi politikoagatik eta instituzionalagatik ere, "ez Nafarroan bakarrik, baita Espainian eta Europan ere".
UPNko gazteriak Nacho Igea izendatu zuen atzo presidentea. Haren alde egin zuten kongresuan bildutakoen %93k. Igearentzat UPNren erronka "proiektu komun bat eraikitzea da, pertsonalismoetatik at".
