Espainiako Kongresuko parlamentari izateak egiten zuen Uxue Barkos forudun, eta, ondorioz, ezin zuten epaitu Nafarroan, Barcinarekin gertatzen den bezala. Geroa Baiko parlamentariak, ordea, uko egin dio eskubide horri, Nafarroako Fiskaltzak Iruñeko Udalean kobratu zituen dieten inguruan ikerketa hasiko duela jakin duenean.
Barkosek eman dio horren berri fiskaltzari, nahiz eta deliturik inputatzen ez zaion. Zenbait bileratan kobratu zituen dieten inguruan nahi dute ikertu, eta ikerketa bultzatzeko hartu du erabakia. Bere lan publikoaren gainean "gardentasun erabatekoa izan dadin" eman du laguntza.
Hala ere, Geroa Baik zehaztu du Barkosek ez zuela kobratu ez zegokion dietarik, "Iruñeko Udalaren ekonomia eta administrazio kontrol organoek eta Kontuen Ganberak baieztatu duten moduan".
