"Gaur Sortu, bihar euskal presoak etxera". Hori idatzi du Perrnando Barrena ezker abertzaleko kideak Twitterren, eta azken urteetan legez kanporatzeen aurka azaldutako guztiak zoriondu ditu. "Ezinezkoa eskuratzerik ez dagoela ematen du lortu egiten den egunera arte", uste du Barrenak —Nelson Mandela Hegoafrikako buruzagiaren esaldi bat da—.
Maribi Ugarteburu ezker abertzaleko eledunak adierazi du Sorturen legeztatzea ez dela opari bat. "Sortu dugu aukera, ez da zerutik erori dena, baizik euskal herritarrok irabazi duguna. Ilegalizazio eta salbuespen aroaren amaiera hasi da".
Jone Goirizelaia abokatuaren arabera, gaurko erabakia "une politiko honetan albiste ona da Euskal Herriarentzat, eta Espainiako Estatuarentzat ere hala izan beharko luke".
Xabier Mikel Errekondo eta Rafa Larreina Amaiurreko diputatuak ere gustura agertu dira. "Normalizazio politikorako pauso garrantzitsua da", esan du Larreinak.
LABek, berriz, "Sorturen aurkako auzibideak eta legez kanporatzeak, azken urteetan Euskal Herrian ireki diren gainerako auziek bezala, bulkada politiko nabarmena izan dute. Sorturen legeztatzea eta D3M eta Askatasunako auzipetuen absoluzioa norabide onean emandako pausoak dira", esan du.
