Basabek dio Aralar dela behar bezalako ezker abertzalearen giltzarria

«Aralar giltzarria da herri honek nahi duen eta behar duen ezker abertzalea izan dezan». Hala azaldu du Mikel Basabe legebiltzarkideak, Araba, Bizkai eta Gipuzkoako udaletarako hautagaien aurkezpenean. Etorkizuneko ezker abertzalea «berdinen artean» eraiki behar dela uste du, «bakoitza nondik datorren eta guztiok nora joan nahi dugun jakinda». Etorkizuneko ezker abertzale horrek Aralarren oinarri programatikoak izango dituela iragarri du. «Gure bideak izan behar du gizarteari bizkarra eman beharrean, hura biltzea. Hori esaten genuen bakarrik geundela eta hori esaten dugu gure bakardadea hain handia ez den honetan ere».