Bat jada ez, bi lupa erabiliko dituztela esan du Rubalcabak

Espainiako Barne Ministerioarena nahikoa ez balitz bezala, Eusko Jaurlaritzako Herrizaingo Sailak ere lupaz begiratuko ditu Bildu koalizioak maiatzaren 22ko bozetarako aurkeztuko dituen hauteskunde zerrendak, atzo Espainiako lehendakariorde eta Barne ministro Alfredo Perez Rubalcabak adierazi zuenez. «Espainiako Gobernuak eta Jaurlaritzak lupa bana jarriko dute, eta koordinatuta eta elkarlanean jardungo dute, inork legeari izkin egin ez diezakion», esan zuen Rubalcabak. Espainiako Barne ministroak baieztatu zuen Estatuko segurtasun indarrek eta Ertzaintzak Fiskaltzaren ofizioak jaso dituztela «hauteskunde iruzurrik badagoen ikerketak egin ditzaten».