Atxilotu egin dute atzo Eibarren (Gipuzkoa) andre bati eraso egin zion 17 urteko gizonezkoa. Bere burua entregatu du Eibarren, Ertzaintzaren komisarian. Eusko Jaurlaritzaren Segurtasun sailaren arabera, erasotzailea biktimaren «bikotekidea edo bikotekide ohia» da. Atxilotua indarkeria matxistako delitu batengatik eta lesioak eragiteagatik akusatu dute.
Sostoatarren kalean gertatu zen erasoa, 15:40 inguruan. Gizonezkoa andrea buruan jotzen hasi zen, lurrera bota zuen, eta jotzen jarraitu zuen. Aizto batekin ere eraso zion, eta hankan sartu zion emakumezkoari. Mendaroko ospitalera (Gipuzkoa) eraman behar izan zuten horregatik.
Lekuko batek erasoa grabatu zuen, eta sare sozialetan hedatu. Bideoan ikusi ahal da emakumezkoa lauzpabost urteko semearekin zegoela, eta ume hori negarrez zuzentzen zaiola erasotzaileari, kolpeekin jarraitu ez dezan.
Eibarko Udalak gertatutakoa «gaitzesteko» adierazpen bat kaleratu zuen atzo, eta babesa adierazi zion biktimari.
Erasoaren aurka, erantzuna
Nalua Eibarko talde feministak «mobilizazio zaratatsura» deitu du gaur ko19:00etarako Untzaga plazan. COVID-19a dela eta, ekintza horretan zer segurtasun neurri hartuko dituzten azaldu dute euren sare sozialetan: segurtasun distantzia mantentzea eta maskarak jantzita eramatea, besteak beste. Naluak adierazi du «pandemia hori» ere —eraso sexistak— bukatu nahi duela.
