Iragan ostiralean sareratu zuen BERRIAk aurreneko zenbakia. Aste honetan, besteak beste, Ebolari buruzko erreportaia eta Susan Georgeren elkarrizketa dira irakurgai. Aplikazioa Google Play-en eta Appleren App Store dendetan jaitsi daiteke, smartphone-etan eta tabletetan jarri ahalko da. Jakinarazpenak piztuta dituztenek zenbaki berria sarean dela adierazten duen oharra jasoko dute.
Argitalpen digital berri bat da BERRIAk irakurleen eskuetan jarri duena: Berria Astekaria. Asteko artikulu hautatuekin, hau da, irakurri gabe utzi ezin diren artikuluekin osatutako bilduma da Berria Astekaria aplikazioa. BERRIAren edukiak zabaltzeko modu berri bat da: astean argitaratutako artikuluen artean hautaketa bat egin, eta telefono eta tabletarako diseinatutako aplikazio batean bilduta ostiralero zenbaki berri bat eskaintzea.
Aplikazioa doan deskargatu daiteke Google Play eta Appleren App Store dendetan, bai smartphone-etan bai tabletetan. Garapen berri hau, funtsean, BERRIAlagunen ekarpenari esker egin da. BERRIAlagun izaten jarraitzea edo BERRIAlagun bihurtzea da modurik hoberena garapena eta berrikuntza eten ez daitezen.
Berria Astekarian asteko artikulu ezinbestekoak eskaini nahi dira, bi aldiz irakurtzea merezi duten artikulu horiek (iritzi artikuluak, analisiak, elkarrizketak, kronikak edota erreportajeak). Diseinu erakargarri eta moderno batean aurkeztuta, era errazean jarri nahi dira irakurleen esku, nonahi eta eroso irakur dezan.
Aplikazioa norberaren sakelako telefono edo tabletetan instalatuta, zenbaki berriak automatikoki kargatzen dira, astero, ostiral goizetan. Zenbaki berria prest dagoenean, erabiltzaileak push jakinarazpen bat jasoko du bere gailuan horren berri emanez. Nahi izanez gero, jakinarazpen horretatik zuzenean ireki ahal izango du aplikazioa, zenbaki berria irakurtzeko.
BERRIAko editoreek hautaturiko albisteak
Zenbaki bakoitzak artikulu kopuru mugatua du (12-20 inguru), irakurleak bilduma erraz ikusi eta gogokoa aukera dezan, eta nahi duen unean era atsegin batean irakur dezan. Artikuluen aukeraketa ez du makina batek egiten, BERRIAko editore taldeak baizik, astero.
Artikuluak gailu mugikorretan irakurtzeko diseinatuta daude, testua eta irudiak era orekatuan txertatuz. Bideoak ere ikus daitezke artikuluetan. Artikulu batetik hurrengora hatza eskuin aldera irristatuz joan daiteke, eta ezker aldera eginez aurrekora itzultzeko.
Artikulu guztiak bana daitezke sare sozialen bidez edo posta elektronikoaren bidez. Halaber, artikuluek esteka bat dute BERRIAren webguneko jatorrizko bertsioa ikusi ahal izateko. Argitaratutako zenbaki guztiak gordeko ditu aplikazioak, eta noiznahi egongo dira irakurlearen esku. Halaber, artxiboak bilatzaile bat du edozein artikulu errazago topatu ahal izateko. Berria Astekaria aplikazioaren garapen teknikoa Ideable enpresa teknologikoak egin du.
