Iaz Iruñean eta Calahorran (Errioxa, Espainia) egindako beste bi atxiloketekin lotu ditu gaurkoak Espainiako Guardia Zibilak. Iturri ofizialen arabera, orduan hasi ziren gaur Irunen atzeman dituzten gizonezkoei jarraitzen, "propaganda jihadista" zabaltzen zutelakoan.
Guardia Zibilaren esanetan, betiere, Turkiara joan zen Irunen atzemandako gizona, Estatu Islamikoarekin bat egiteko asmoz, baina nazioarteko poliziek atzeman, eta kanporatu egin zuten. Besteak beste, "Estatu Islamikoaren aldeko propaganda" zabaltzea leporatzen diote.
Donostian atxilotutakoak 24 urte ditu, eta gauza bera egotzita atxilotu dute. Sare sozialetan Estatu Islamikoaren aldeko bideoak eta idatziak argitaratzen zituela zabaldu du Espainiako Barne Ministerioak.
