38 urteko gizon bat eta 23 urteko beste bat hil dira Beriainen (Nafarroa) bart, auto istripu baten ondorioz, eta 24 urteko beste gizon bat larri dago. Autoak etxebizitza bateko hormigoizko pareta bat jo du 23:45ean, Idiazelaia kalean, eta gidaria eta kopilotua orduan hil dira.
Medikuak, anbulantzia bat eta suhiltzaileak joan dira ezbeharra izan den lekura, eta bi gizonen heriotza egiaztatu dute. Larri zauritutako bidaiaria Nafarroako Ospitale Unibertsitariora eraman dute, eta han ospitaleratu, politraumatismo oso larriak dituela eta.
Bi gorpuak Auzitegi Medikuntzaren eta Zientzia Kriminalistikoen Nafarroako Institutura eraman dituzte, autopsia egiteko. Foruzaingoa istripua ikertzen ari da.
