Bi urtean bikotekideak hainbat alditan bortxatu duela salatu du neska batek

Bilboko Udaltzaingoak E.N.M.M. 22 urteko mutil bat atxilotu zuen atzo. Neskalagunak —19 urtekoa— haren kontrako salaketa jarri zuen Udaltzaingoan. Hain zuzen ere, haien harremanak iraun duen bi urteetan mutilak hainbatetan bortxatu egin duela salatu du neskak, eta, horrez gain, tratu txarrak eta heriotza mehatxuak ere egin izan dizkiola. Udaltzaingoaren iturrien arabera, neskak jakinarazi du haurdun zegoela, mutilak emandako jipoiaren ostean izan zuela abortu bat, duela hilabete batzuk. Igande goizean jo zuen neskak Bilboko udaltzainengana, urduri eta negarrez. Haren testigantzaren arabera, labana batekin mehatxatu izan du sarritan, eta elkarrekin bizi ziren etxean itxita atxiki izan du gela batean. Azken asteotan hainbat aldiz jo eta bortxatu duela ere leporatu dio neskak mutilari.