Bilboko udaltzain bati bikotekide ohiarengandik urruntzeko agindua eta harekin mintzatzeko debekua ezarri zioten iragan astean, baita 60 egunez gizartearendako lanak egiteko zigorra ere. Bikotekide ohiari jazartzeagatik zigortu dute gizona, emaztekiaren autoan GPS gailu bat jarri baitzuen, hura zelatatzeko. Bilboko Itaiak kasua salatu du, eta udalaren eta alderdi politikoen isiltasuna kritikatu: «Ez dute erasoa gaitzetsi, eta ez dute neurririk hartu erasotzailea zerbitzutik kentzeko». Antolakundeak adierazi du ezin dela bertze aldera begiratu, eta polizia indarren erasoak ezin direla oharkabean pasatu.
Halaber, Bilboko Itaiak poliziaren «izaera zapaltzailea eta praktika matxista eta klasistak» salatu ditu: «Zalantzan jartzen dugu poliziak emakume langileen segurtasuna berma dezakeenik». Izan ere, antolakundearen erranetan, poliziek egindako sexu erasoen kopurua «handia eta kezkagarria» da. Hortaz, beren irudiko, polizia indartzeak ez du indarkeria matxista amaituko: «Langile klase osoa zapaltzen duen instituzioa normalizatzeko aitzakia besterik ez da».
Gogoratu dute iazko azaroan Bilboko Txurdinaga auzoan udaltzain batek gauzatutako bertze indarkeria matxista kasu bat egon zela, eta hura ere salatu zuela antolakundeak.
Frantziako indar armatuak
Kasu bakana ez dela erakusteko, Frantziako Disclose hedabidearen ikerketa bat ekarri dute gogora, herrialdeko poliziek eta jendarmeek egindako sexu erasoei buruzkoa: lan horren arabera, 2012 eta 2025 bitartean gutxienez 429 emakumek jasan zituzten eta 212 erasotzaile egon ziren.
Datuak publiko egin zirenean, salaketa egin zuen Ipar Euskal Herriko Itaiak, eta erran poliziek baliabide ofizialak erabiltzen zituztela zaurgarritasun egoeran dauden emazteak «beldurrarazteko, gutxiesteko eta haiei erasotzeko».
