Tenperatura gora ari da berriro Euskal Herrian, eta maiatzaren amaieran izan zen bero boladako tenperaturak gaindituko dira asteburuan. Bilbon, esaterako, termometroek 40 gradu erregistratuko dituztela aurreikusi dute, eta, prebentzioz, egun horretan egitekoak ziren bi ekitaldi bertan behera uzte erabaki dute. Izan ere, Bilboko hiribilduaren 726. urteurreneko desfilea ziren egitekoak, baina azkenean ez da egingo. Bestalde, Artxanda mendian beste ekitaldi bat egitekoak ziren, 1936ko gerrako hainbat gudariren eta milizianoren omenaldia, baina hori ere ez dute egingo azkenean.
Hego Euskal Herri osoan alerta laranja aktibatu dute iganderako, bai Eusko Jaurlaritzak eta bai Nafarroako Gobernuak, tenperaturak espero baino beroagoak izango direlako. Zehazki, Hego Euskal Herri guztian 12:00etatik 20:00etara egongo da aktibo alerta laranja: Araban, alerta hori egun osoan egongo da, baso suteen arriskua handia izango delako; Bizkaian eta Gipuzkoan, alerta horia egongo da baso suteen arriskuagatik. Gainontzeko orduetan, berriz, alerta horia egongo da. Pirinio Atlantikoen Departamenduan ere alerta laranja eman dute biharko, beroagatik, eta, beraz, Ipar Euskal Herrian ere egoera berean izango dira larunbatean.
Nahiz eta berorik handiena igandean espero den, gaur ere alarma horia aktibatuta dago Hego Euskal Herriko hainbat txokotan, eta hala segituko dute bihar ere.
