Bizkaiko etengabeko arretako langileen %80k egin dute lanuztea

Bizkaiko etengabeko arreta guneetan lan egiten duten 150 langileetatik %80k egin zuten atzo lanuztea, protestara deitu duten langileen esanetan. Gutxieneko zerbitzuak bermatu dituztela nabarmendu dute, eta kasuak larriak baino ez dituztela artatu. Osakidetzak ere, bestaldetik, gutxieneko zerbitzuak bermatu direla aipatu zuen prentsa ohar batean, eta «inolako arazorik gabe eta normaltasun osoz» egin zutela lehen lanuztea. Gaur ere greba egingo dute, eta «Osakidetzak jarrera aldatu ezean», azaroaren 22tik 28ra ere greba egiteko asmoa azaldu dute. Abenduan ere beste hiru egunetan egingo dute greba: hilaren 1ean, 11n eta 12an. Lan baldintza «txarrak» dituztela salatzen dute langileek.