Nahitaezko soldadutza duela 19 urte gelditu zen bertan behera Frantzian. Bada, Francois Hollanderen gobernuak "borondatezko soldadutza" jarriko du indarrean orain, "gazteak lan munduan sartzeko helburuarekin". Armada gazteen "formazioaz" arduratuko da, ondoren gazteak enpresetara bideratzeko. Aurten lau zentro ireki asmo dituzte, eta beste hiru datorren urtean. 2.000 gazterentzako lekua izango dute.
Ez da neurri berria, hala ere. Frantziaren kolonia izandakoetan dagoeneko indarrean dago "borondatezko soldadutza". Gobernuaren datuen arabera, iaz, esaterako, 5.600 gaztek egin zuten. 18 eta 25 arteko gazteei dago zuzenduta.
Lanerako "prest" egoteko "oinarrizko hezkuntza" jasoko dute. Izena ematen dutenek hainbat arau betetzera "konprometitu" behar dute: puntualtasuna, "zuzen" janztea, burua errespetatzea, segurtasuna eta taldean lan egitea.
